Türkiyəli müğənni Bülənd Ərsoy Bakıda konsert verəcək.

Kult.az xəbər verir ki, bu məlumatı bir müddət əvvəl ifaçıya 100 min dollarlıq üzük hədiyyə etməsi ilə gündəmə gələn Nigar Məmmədova adlı azərbacanlı iş adamının şirkəti yayıb.

“Diva Bülənd Ərsoy Azərbaycana gəlir! Nəhayət! “100-cü Möcüzəvi Yubiley” konserti Azərbaycanda! “Bumeranq Label” (Boomerang Label) bu günə qədər heç kimin edə bilmədiyini edəcək. Bizi gözləyin! Bülənd Ərsoy, dəvətimizi qəbul etdiyinizə görə dərin minnətdarlığımızı bildiririk! Sonsuz sayqı və sevgilərlə...”

Müğənni isə paylaşılan videoda oktyabrın 24-də Bakıda konsert proqramı ilə çıxış edəcəyi bildirilib:

“Yenə öz vətənimdən öz vətənim kimi gördüyüm qardaş ölkəyə gedəcəm. İndidən bütün dinləyicilərimə, musiqisevərlərə təşəkkürümü bildirirəm”.

Qeyd edək ki, “Boomerang Label” şirkətinin rəhbəri, azərbaycanlı iş adamı Nigar Məmmədova türkiyəli müğənni Bülənd Ərsoya 100 min dollarlıq üzük hədiyyə etmişdi. Onun bu addımı isə birmənalı qarşılanmamışdı. Belə ki, bir müddət öncə Azərbaycan xalqı haqqında “mənşəyi bilinməyən xalq” ifadəsini işlətmişdi.

N.Məmmədovanın bu qədər tənqiddən sonra B.Ərsoyun Bakıda konsertini təşkil etməsi isə təəccüblə qarşılanıb.