Qərb mediası xəbər verdi ki, Rusiya Ukraynaya qarşı müharibədə Trampa güzəşt olaraq “hava atəşkəsi” təklif edə bilər. Lakin belə bir atəşkəs Ukraynaya çoxlu qəm-qüssə və problemlər gətirəcək.

Axar.az xəbər verir ki, bunu Ukrayna Quru Qoşunları Ehtiyatçılar Şurasının rəhbəri İvan Timoçko bildirib.

Onun sözlərinə görə, əgər cəbhədə döyüş əməliyyatları dayandırılmasa, belə bir atəşkəs zamanı ruslar cəbhə xəttinə yaxın böyük sayda qoşun və texnika toplaya biləcəklər. Bundan əlavə, düşmən öz anbarlarını artilleriya zərbəsi məsafəsinə yaxınlaşdıra bilər.

“Ruslar bu anbarları açıq havada, təxminən 30-40 km məsafədə qura bilərlər, çünki belə halda arxa cəbhələrə PUA-ların zərbələri məhdudlaşdırılacaq. Üstəlik, onların, məsələn, hava və aviasiya zərbələrini dayandıracaqları dəqiq deyil. Rusları tanıyırıq, hansısa ayrıca təyyarə növündən istifadəni qadağan etməyi, digərlərindən isə istifadəni davam etdirməyi təklif edə bilərlər. Yəni burada onlar oyun oynaya bilərlər”, – deyə o əlavə edib.

Qeyd edək ki, daha öncə Rusiyanın Ukraynaya “hava atəşkəsi” təklifini edəcəyi xəbəri yayılıb.