Nepalın paytaxtı Katmanduda polisin gənc etirazçılara atəş açması nəticəsində azı 16 nəfər həlak olub, 90 nəfər yaralanıb.

Axar.az xəbər verir ki, bu barədə BBC telekanalı bildirib.

Məlumata əsasən, polis minlərlə gənc parlament binasına doğru hərəkət edərkən atəş açıb. Etirazçıları dağıtmaq üçün su şırnaqlarından və gözyaşardıcı qazdan da istifadə edilib.

Etirazlara korrupsiya və sosial şəbəkələrlə bağlı yeni qanun layihəsi səbəb olub. Nümayişçilər ölkədə korrupsiyaya son qoymağa çağıran pankartlar qaldırıblar. Nepal hökuməti bildirib ki, “saxta xəbərlər” və nifrət təbliğatının yayılması ilə mübarizə aparmaq üçün sosial medianın tənzimlənməsi lazımdır.