Hesablamalara görə, Urmiya gölünün qurumuş yatağında təxminən on milyard ton duz var. Göl yatağının təxminən 5500 kvadrat kilometr sahəsi olduğunu nəzərə alsaq, daimi küləklər və fırtınalar vasitəsilə bu duz kütləsinin ətraf bölgələrə yayılacağını bildirə bilərik.

Axar.az xəbər verir ki, bunu iranlı kinorejissor Möhsün Qasid sosial media hesabında yazıb.

O, Urmiya gölünün quruması nəticəsində baş verəcək ekoloji fəsadlar barədə xəbərdarlıq edib:

"Duz tozunun havaya sovrulması gölün ətrafındakı şəhər və kəndlərdə dəri, tənəffüs, görmə və hətta müxtəlif növ xərçəng xəstəliklərinin yayılmasına səbəb olacaq. Bu hadisə kənd təsərrüfatı torpaqlarını və bağları da məhv edəcək və uzunmüddətli perspektivdə ölkənin şimal-qərbi səhralaşacaq", - sənətçi yazıb.

Qeyd edək ki, maksimum 33, minimum 15 milyard kubmetr su tutumu olan Urmiya gölü quruyub və hazırda göldə yalnız 200 milyon kubmetrə yaxın su qalıb.