Antirusiya sanksiyalarına məruz qalan malların gömrük yoxlamalarının artırılması səbəbindən Qazaxıstan-Rusiya sərhədində 2500-ə yaxın yük maşını saxlanılır.

Axar.az xəbər verir ki, bu barədə Rusiyanın “Lenta.ru” saytı məlumat yayıb.

Məlumata görə, problem sentyabrın ortalarında, Qazaxıstan gömrükçülərinin elektronika, dron və Qərb markalı məhsulların göndərilməsini dərindən yoxlamağa başlayanda yaranıb:

“Vəziyyət Çinin milli bayramları zamanı Çin-Qazaxıstan sərhədindəki keçid məntəqələrinin bağlanması ilə daha da gərginləşib. Bu gecikmələr 3-5 gün çəkir və şirkətləri tarifləri qaldırmağa, Rusiya-Çin sərhədindən alternativ yollar axtarmağa məcbur edir. Qazaxıstan və Çin arasındakı sərhəddə təxminən 10 000 yük maşını ilişib qalıb. İki ölkənin hakimiyyət orqanları yük daşımaları üçün icazələrin sayının artırılması ilə bağlı danışıqlar aparır”.