ABŞ Maliyyə Nazirliyi Rusiyanın “Rosneft” və “Lukoyl” neft şirkətlərinə qarşı ona görə sanksiyalar tətbiq edib ki, Rusiya Prezidenti Vladimir Putin Ukrayna ilə bağlı danışıqlarda dürüst olmayıb.

Axar.az xəbər verir ki, bunu ABŞ-ın maliyyə naziri Skott Bessent deyib.

“ABŞ Putinin münaqişəni dayandırmaqdan imtina etməsini nəzərə alaraq məhdudiyyətlər tətbiq edir. Prezident Putin ümid etdiyimiz kimi dürüst və açıq danışıqlar aparmadı. İki lider avqustun 16-da Alyaskada görüşəndə ​​prezident Tramp işlərin irəli getmədiyini anladı. Pərdəarxası danışıqlar olub, amma prezident onların hazırkı vəziyyətindən məyusdur”, - Bessent bildirib.

Qeyd edək ki, oktyabrın 22-dən 23-nə keçən gecə ABŞ Maliyyə Nazirliyi Rusiyanın Ukrayna münaqişəsinin sülh yolu ilə həllində kifayət qədər marağı olmadığına görə iki aparıcı neft şirkəti olan “Rosneft” və “Lukoyl”a yeni sanksiyalar tətbiq edib.