İslandiya hakimiyyəti geosiyasi gərginliyin artması səbəbindən Avropa Birliyinə daxil olma prosesini vaxtından əvvəl bərpa etmək imkanını nəzərdən keçirir.

Axar.az xəbər verir ki, bu barədə “Politiko” nəşri məlumat yayıb.

“İslandiyanın hakim koalisiyası əvvəlcə 2027-ci ilə qədər Avropa Birliyinə qoşulma prosesini başlatmağı planlaşdırırdı. İndi ABŞ Prezidenti Donald Trampın Danimarkanın Qrenlandiyadakı muxtariyyətinə qarşı təhdidlərindən və tariflərin tətbiqindən sonra ölkə hakimiyyəti 2026-cı ilin avqust ayında referendum keçirmək istəyir. İslandiya parlamentinin səsvermənin tarixini yaxın həftələrdə elan edəcəyi gözlənilir. İslandiyalılar AB-yə qoşulmaq üçün səs verərsə, digər namizəd ölkələrdən əvvəl icmaya qoşula biləcəklər. İslandiya artıq Şengen zonasının və Avropa İqtisadi Zonasının bir hissəsidir, ona görə də bir çox AB qanunları artıq onun ərazisində qüvvədədir. Lakin AB-yə qoşulmaq üçün Reykyavik birinci referendumun nəticələrinə əsasən daha bir referendum keçirməlidir”, - məlumatda deyilib.

Qeyd edək ki, İslandiya 2009-cu ildə maliyyə böhranı zamanı AB-yə qoşulmaq üçün müraciət etmişdi. 2013-cü ildə iqtisadi vəziyyət yaxşılaşdıqca ölkə hökuməti üzvlük danışıqlarını dayandırmışdı.