İranda müharibə ABŞ Prezidenti Donald Trampın Yaxın Şərqdə ildırımsürətli əməliyyat aparmaq və daha əvvəl verdiyi “müharibələri bitirmək” vədlərinə baxmayaraq, uzunmüddətli qarşıdurmaya çevrilə bilər.

Axar.az xəbər verir ki, bu barədə “Faynənşl Tayms” qəzetinin yazarı Edvard Lyusun məqaləsində qeyd olunub.

Onun yazdığına görə, hazırda Donald Tramp İranla münaqişəyə cəlb olunub və hətta onun kabineti, Konqres və ABŞ müttəfiqləri belə çıxış planının necə göründüyünü bilmir.

“Trampın məqsədləri ilə bağlı bir neçə fərqli mövqeyi var. İlk 72 saat ərzində o, İranın nüvə silahı proqramını ləğv etmək, İranın terror ixrac etmək qabiliyyətinə son qoymaq, mövcud rejimi devirmək və ya onun yerinə işləyə biləcəyi yeni bir lider tapmaq istədiyini bəyan edib”, - məqalədə bildirilib.

O, həmçinin Trampın İranda küçə toqquşmalarını dayandıra biləcəyinə şübhə etdiyini vurğulayıb:

“Tramp iranlıları üsyana çağırsa da, onlar bunun intihar olub-olmayacağını bilmirlər. Rejimlər havadan dəyişmir. Tramp yalnız ölkəyə müdaxilə etməklə kömək edə bilərdi”.

Lyus belə nəticəyə gəlib ki, İranla bağlı müharibənin sonu gözlənilməz olacaq və bu müharibənin necə inkişaf edəcəyini bildiyini iddia edən hər kəs, o cümlədən Tramp da blef edir. Eyni zamanda İranda hakimiyyətin sülh yolu ilə ötürülməsi “ən az ehtimal olunan” variantlardan biri hesab olunur.