Yaxın Şərqdə münaqişənin kəskinləşməsi fonunda Birləşmiş Ərəb Əmirlikləri faktiki olaraq müharibə vəziyyətindədir.

Axar.az xəbər verir ki, bunu Birləşmiş Ərəb Əmirliklərinin Prezidenti Şeyx Məhəmməd bin Zayed ən-Nəhyan deyib.

"Hazırda müharibə şəraitində yaşayırıq, söz verirəm ki, ölkəmizin və onun sakinlərinin müdafiəsi ilə bağlı üzərimə düşən öhdəlikləri yerinə yetirəcəyəm. Hər kəsə söz verirəm ki, BƏƏ bu vəziyyətdən daha güclü çıxacaq", - o bildirib.

Prezident həmçinin vurğulayıb ki, ölkənin silahlı qüvvələrinin dövlət təhlükəsizliyinin təmin edilməsi istiqamətində fəaliyyətini yüksək qiymətləndirir.

Qeyd edək ki, İsrail və ABŞ İrana qarşı 28 fevraldan hərbi əməliyyata başlayıb. Əməliyyatın ilk dəqiqələrində endirilən zərbələrlə İranın ali dini lideri Əli Xamenei başda olmaqla, 40-a yaxın yüksək səviyyəli məmur və komandir ölüb.

İran ABŞ-ın Yaxın Şərqdəki hərbi obyektlərinə və İsrailə zərbələr endirir. Tehran Körfəz ölkələrinin mülki obyektlərini də hədəf alır.