Ukrayna tədricən müharibəni Rusiya ərazisinə keçirir və artıq Rusiya Federasiyasının hər yerində hava zərbələrinin səsi eşidilir. Bu günlərdə Moskva bölgəsində ölkənin hərbi infrastrukturuna yönəlmiş 250-dən çox hava obyekti qeydə alınıb.

Axar.az Sfera.az-a istinadən xəbər verir ki, bu fikirləri Ukrayna mediasına açıqlamasında müdafiə nazirinin müavini Aleksey Vıskub bildirib.

Vıskub qeyd edib ki, Ukrayna təcavüzkarın hərbi infrastrukturuna sistematik şəkildə zərbələr endirir. Buna cavab olaraq Kreml, həmişəki kimi, isterik və xaotik şəkildə Ukraynadakı mülki obyektlərə zərbələr endirməyə çalışır.

O xatırladıb ki, bu yaxınlarda Rusiya hərbi və kimya sənayesinin raket, dron və partlayıcı maddələrin istehsalını təmin edən bir sıra əsas obyektlərinə zərbələr endirilib. Xüsusilə, Ukrayna Bryanskdakı "Kremniy El" zavoduna hücum edib. Hazırda raket və dronlar üçün komponentlər istehsal edən zavod təmirolunmaz hesab olunur.

Nazir müavini aydınlıq gətirərək bildirib ki, Rusiyada yalnız iki belə zavod var.

O, həmçinin qeyd edib ki, ən uzaq məsafədən zərbə Ukraynadan 1500 km-dən çox məsafədə, Perm ərazisində yerləşən kimya sənayesi müəssisəsi "Metafrax Chemicals"ə endirilib.

Nazir müavini vurğulayıb ki, dünyanın diqqəti Yaxın Şərqdəki hadisələrə yönəlsə də, demək olar ki, bütün Rusiyada hava hücumları barədə xəbərdarlıqlar edilir.

"Dünyanın diqqəti Yaxın Şərqdəki hadisələrə yönəlsə də, başqa bir şey də demək olar ki, diqqətdən kənarda qalır: Rusiya Federasiyasının bütün ərazisində hava hücumları barədə xəbərdarlıqlar demək olar ki, daim eşidilir, hətta Moskva iki gündür ki, Ukrayna dronlarının davamlı hücumuna məruz qalır. Moskva meriyasının kanalı demək olar ki, hər 10 dəqiqədən bir Ukrayna PUA-larının "vurulması" və ya "ələ keçirilməsi" barədə məlumat verir", - deyə o qeyd edib.