Yaxın Şərqdəki müharibə artıq qlobal mayeləşdirilmiş təbii qaz (LNG) bazarında ciddi pozuntulara səbəb olub.

Axar.az xəbər verir ki, bu barədə “Blumberq” agentliyi yazıb.

Nəşrin yazdığına görə, ən böyük zərbə inkişaf etməkdə olan ölkələrə dəyir, lakin risklər sürətlə Avropaya da yayılır:

“Qətərdə yerləşən “Ras Laffan" zavodu bu ayın əvvəlində İran pilotsuz uçuş aparatının hücumundan sonra bağlanıb. Bu, zavodun üç onillik fəaliyyəti ərzində ilk dəfə tədarükün dayanması deməkdir. Sonrakı zərbələr dağıntıları daha da artırıb və ziyanın miqyası hələ də məlum deyil.

Dünyanın ən böyük mayeləşdirilmiş qaz istehsalı zavodunun bir həftə fəaliyyətsiz qalması Avstraliyanın Sidney şəhəri böyüklüyündə bir şəhəri bir il elektriklə təmin etməyə yetəcək qədər enerji itkisi deməkdir. Bu isə dünya iqtisadiyyatlarında enerji yükünü artırır.

Yaxın Şərqdə üç həftə davam edən müharibə qlobal enerji təchizat zəncirlərini alt-üst edib. Hörmuz boğazının faktiki blokadası benzin və aviasiya yanacağının qiymətlərinin kəskin artmasına səbəb olub, Hindistanda yemək bişirmək üçün qaz qıtlığı dava-dalaşlara gətirib çıxarır, fermerlər isə dizel yanacağı və gübrə ilə bağlı narahatdırlar.

Demək olar ki, ehtiyatların olmaması, strateji rezervlərin azlığı və asan alternativlərin tapılmaması fonunda mayeləşdirilmiş təbii qaz (LNG) böyüyən böhranın ən ağrılı nöqtələrindən birinə çevrilə bilər”.