Ukraynada özəl hava hücumundan müdafiə qruplarının yaranması hazırda Rusiya tərəfindən həyata keçirilən hücumlara kifayət qədər maraqlı və asimmetrik cavabdır.

Axar.az xəbər verir ki, bunu ukraynalı aviasiya üzrə ekspert Boqdan Dolintse deyib.

"Bu, həm də bizneslərin ölkənin hava məkanının, o cümlədən öz istehsal və infrastruktur obyektlərinin qorunmasına effektiv şəkildə qoşulması üçün bir fürsətdir", - o bildirib.

Ekspertin sözlərinə görə, hazırda bu sistemin nə dərəcədə effektiv olduğunu söyləmək çətindir, çünki bu məlumatlar ictimaiyyətə açıq deyil:

"Bu cür şəxsi hava hücumundan müdafiə sistemlərindən danışırıqsa, ümumiyyətlə, qeyri-invaziv vasitələrin, məsələn, elektron müharibə sistemlərinin, yəni müəyyən passiv vasitələrin istifadəsindən danışmaq olar. Və ya, məsələn, ələ keçirən dron texnologiyasından istifadə və s. Təbii ki, bu, Ukraynanın təhlükəsizlik və müdafiə qüvvələrinin ciddi koordinasiyası əsasında edilməlidir ki, düşmən hədəflərini aşkar edən və məhv edən digər ekipajlar üçün təhlükə yaratmasın".