Son illər Azərbaycanın Mərkəzi Asiya dövlətləri, o cümlədən Qırğızıstanla strateji tərəfdaşlığı daha da dərinləşməkdədir. Bu, özünü iqtisadi əlaqələrdə də göstərməkdədir.

Axar.az xəbər verir ki, bu sözləri millət vəkili, iqtisadçı alim Vüqar Bayramov Prezident İlham Əliyevin Qırğızıstana səfəri ilə bağlı qeyd edib.

O bildirib ki, 2025-ci ildə Azərbaycanla Qırğızıstan arasındakı ticarət dövriyyəsi 2024-cü ilə nisbətən 93 faiz artaraq 77 milyon dollara çatıb:

“Ölkələr 236 məhsul növü üzrə ticarət əlaqələri həyata keçiriblər. Ticarət dövriyyəsində Qırğızıstan 30 milyon dollarlıq müsbət saldoya malikdir.

Qırğızstandan hansı məhsulları alırıq və nə satırıq?

Qardaş dövlət ilə idxal və ixracda iki məhsul dominant hesab olunur. Qırğızıstandan idxalımızın 83 faizini qızıl məmulatları, ixracımızın isə tam yarısını nəqliyyat vasitələri təşkil edir. Ötən il Azərbaycan Qırğızıstandan 44.7 milyon dollarlıq qızıl alıb. “710813” məhsul kodu üzrə rəsmilləşən bu idxal UNSD təsnifatına əsasən "Qeyri-monetar məqsədlər üçün yarımfabrikat formalarda olan qızıl” kimi qruplaşdırılır. 2025-ci ildə Azərbaycan isə qardaş ölkəyə 12 milyon dollar dəyərində minik avtomobilləri, mühərrikinin həcmi 3000 kub sm-dən çox olan, yalnız qığılcımdan alışan, porşenli, daxili yanma mühərrikli nəqliyyat vasitələri ixrac edib.

Digər idxal məhsullarına gəldikdə isə qabığı təmizlənmiş yunan qozu (3.1 milyon dollar), günəbaxan toxumu (1.9 milyon dollar) və qurudulmuş mərci (1.2 milyon dollar) daha çox paya malikdir. İxacatımızda isə sürtkü yağları (3.6 milyon dollar), metalın emalı üçün emal mərkəzləri, üfüqi aqreqat dəzgahlar (1.3 milyon dollar) nisbətən xüsusi çəkiyə sahibdirlər.

İki ölkə arasındakı ticarət dövriyyəsini artırmaq üçün potensial kifayət qədər yüksəkdir. Xüsusən ticarətin dayanıqlığı baxımından məhsul növləri üzrə şaxələndirməyə nail olmaq çox vacibdir”.