Rusiya ətrafındakı ölkələri özünün əməliyyat zonası hesab edir.

Axar.az xəbər verir ki, bu barədə Yeni Amerika Təhlükəsizliyi Mərkəzinin baş elmi işçisi Robert Kaplan "Vol Strit Jurnal" qəzetində çap olunan məqaləsində yazıb.

Müəllif yeni ABŞ prezidentinin Rusiyayla bağlı aparmalı olduğu siyasətin istiqamətlərini cızmağa çalışıb. O, hazırda Avrasiyadakı iki böyük avtoritar rejimdən ən təhlükəlisinin Rusiya olduğunu qeyd edib:

"Çin də materik ətrafındakı sulara hakim olmaq istəyir. Amma buna tədricən, ABŞ-la müharibəyə girmədən nail olmağa çalışır. Çin "soyuq", Rusiya isə "isti" təcavüz edir.

İndi Rusiya üçün əlverişli şərait yaranıb. Çünki ABŞ administrasiyası fəal görünmür, yeni prezident hələ gəlməyib, yəni Putinin müharibə siyasətində tarazlığı istədiyi istiqamətdə dəyişməyə bundan yaxşı fürsət ola bilməz.

Hazırda Rusiyanın iqtisadi durumu Çindən qat-qat pisdir. Bu isə o deməkdir ki, Rusiya liderlərinin millətçiliyi önə çəkməyə daha çox ehtiyacı var. Problem odur ki, qərbdəkilər bunu anlamır və tarixən formalaşmış təhlükə və etimadsızlıq, qorxu hissi rusların təzyiqini daha kobud, həyasız, qanlı və riskli təcavüzə çevirir. Çin mübahisəli adalarda dəmiryolu çəkib, mübahisəli sulara balıqçı donanmaları göndərdiyi halda, Rusiya Ukraynaya xizəkçi maskası geymiş qatillər, Suriyaya isə kaset bombaları göndərir".

Müəllif Rusiyanın hazırda 4 zonaya – Baltik dənizi, Qara dəniz hövzəsi, Ukrayna və Suriyaya müdaxilə etdiyini yazıb:

"Bunların hamısı "yaxın sərhəd"dir, keçmişdə Sovet İttifaqının təsir dairəsi hesab olunub. Və indi Putin bütün bu zonalara müdaxilə ilə ABŞ-ın təzyiqini idarə etməyə çalışır. Məsələn, ABŞ ona Suriyada təzyiq göstərməyə çalışırsa, Putin ABŞ-a Baltikyanı ölkələrdə cavab verir. Əslində ABŞ Hələbin vəziyyətini yüngülləşdirə bilər, bunu hərbi mütəxəssislər də təsdiqləyər. Amma bir şeyi unutmaq olmaz: Dəməşqdəki rejimi devirməklə ölkənin şimalında vəhşi təcavüzü önləmək arasında böyük fərq var.

Xarici siyasət məsələsində yeni ABŞ prezidentinin qarşısında dayanacaq ən böyük sual budur: ABŞ Baltik dənizindən Suriya səhralarına qədər təsir vasitələrini necə quracaq? Yəni Rusiya ilə danışıqlarda strateji nəticəyə nail olmaqdan ötrü ABŞ harada dayanmalıdır?

İndiki Dövlət katibi Con Kerri diplomat rolunu oynamır, missiya yerinə yetirir. Kerrinin siyahısında ABŞ maraqları yox, sadəcə danışıqları təşkil etmək var. Dövlət katibi xarici siyasətdə maraqların dəyərlərdən öndə olduğunu anlamır".

Yazıda Qərbin Suriyaya müdaxiləsi, ABŞ əsgərlərinin Avropaya qayıdışı, Fars körfəzinə əlavə qüvvənin yerləşdirilməsi təklif olunub:

"Bu addımlar Putini Suriyada daha mülayim davranmağa vadar edə bilər. Rusiyaya Şərqi və Mərkəzi Avropada ciddi təzyiq göstərməklə ABŞ Rusiyanı vacib danışıqlar masasına çəkməyə şərait yaratmış olar. Digər tərəfdən, Suriya regional müharibə zonasına çevrildiyindən digər region ölkələri – Türkiyə, İran, Səudiyyə Ərəbistanı da danışıqlara cəlb edilməlidir.

Reallıq budur ki, Rusiyanın yaxın sərhədlərə təcavüzü güc balansını pozub və bu təcavüzə bəzən konkret cavab verilməlidir".