Tramp yanacaq qiymətlərinin kəskin artımında Ukraynanı ittiham edərək, onu “günah keçisi” edib.

Axar.az xəbər verir ki, bu barədə “Politiko” Moskva və Kiyev arasında ABŞ-ın vasitəçiliyi ilə aparılan danışıqlardan xəbərdar olan və adı açıqlanmayan yüksək rütbəli Avropa rəsmisinə istinadla yazıb.

“Tramp administrasiyası noyabrın 3-də keçiriləcək ABŞ-dakı aralıq seçkilər ərəfəsində “günah keçiləri” axtarır. Bu administrasiya Ukraynanı günahlandırır, çünki öz müharibəsi (İran) ilə bağlı nə edəcəyini bilmir. Rusiyanın dizel və neft ixracı ABŞ-ın istehlakı üçün heç vaxt əhəmiyyətli olmayıb. Bu ideyanın özü belə absurddur. Üstəlik, hamımız Prezident Trampın Amerikanın istənilən miqdarda neft təmin edə biləcəyini dediyini eşitmişik", - mənbə bildirib.

Mənbənin sözlərinə görə, əgər Vaşinqton Kiyevin Rusiya neft emalı zavodlarına hücumları dayandırmasını istəyirsə, o zaman Moskvanı Ukraynanın enerji şəbəkəsinə zərbələri dayandırmağa məcbur etməlidir:

“Enerji sahəsində atəşkəs qarşılıqlı olmalıdır. Putin ABŞ administrasiyasına hörmət etmir. Məhz buna görə də atəşkəs heç vaxt bərqərar olmadı”.

Qeyd edək ki, Tramp Ukraynanı Rusiyanın “dizel ixracına” mane olmamağa çağırıb.