İranın keçmiş prezidenti Məhəmməd Xatəmi mayın 3-də islahatçıların siyasətini təyin edən Ali Şura üzvləri ilə görüşərək, qarşıdan gələn prezident seçkilərindən və Prezident Həsən Ruhanidən danışıb.

Axar.az xəbər verir ki, islahatçıları və əhalini Həsən Ruhaniyə səs verməyə çağıran Xatəmi Ruhaninin seçilməyəcəyi təqdirdə ölkənin beynəlxalq arenadakı imicinin itiriləcəyini bildirib.

“Ruhaninin seçkilərdə qalib gəlməməsi İranın dünya birliyindən ticrid olunması və ölkəyə qarşı beynəlxalq sanksiyaların bərpası ehtimalını gücləndirəcək. Ona görə də bizim prezidentliyə yeganə namizədimiz Həsən Ruhanidir. Hesab edirəm ki, ölkənin və xalqın məsləhəti və mənafeyi indiki prezident Həsən Ruhani hökumətinin davam etdirilməsindədir və biz buna çalışmalıyıq. Əks təqdirdə, Ruhanidən əvvəlki ağır şəraitin yenidən geri qayıtması ehtimalı çox böyükdür”, - Xatəmi deyib.

İranda növbəti prezident seçkiləri bu il mayın 19-da (1396-cı il, ordibeheştin 29-da) keçiriləcək.

Seçkilərdə 6 namizəd (Həsən Ruhani, İshaq Cahangiri, İbrahim Rəisi, Məhəmmədbağır Qalibaf, Mustafa Mirsəlim və Mustafa Haşimi Təba qatılıb) prezidentlik uğrunda mübarizə aparır.