"İraq 3 hissəyə bölünəcək".

Axar.az bildirir ki, bir qayda olaraq ABŞ hökumətinin baxışlarını əks etdirən "Taym" ("Time") jurnalı yeni sayında ətraflı şəkildə İraqdakı son təhlükəsizlik böhranına nəzər salıb və üz qabığında İraq xəritəsindən bir təsvir seçərək, iri titrlə yazıb: "İraqın sonu".

"Taym" jurnalında ilk dəfə olaraq İraq barədə bir xəritə nəşr olunub. Həmin xəritədə İraqın üç hissəyə necə bölünməli olduğu göstərilib. Jurnalın iddiasına görə, İraq şiə, sünni və kürd olaraq 3 hissəyə bölünəcək.

Müəllif bu qənaətdədir ki, İraq üç hissəyə - Kürdüstan (şimal-şərq), Sünnistan (şimal, qərb və cənubun bir hissəsi) və Şiəstan (cənub və Küveytin bir hissəsi) şəkilində bölünəcək. Kərkük İraq Kürdüstanının coğrafi xəritəsində yerləşəcək, şimalda yerləşən Mosul, həmçinin Küveyt və Ərəbistanın cənubundakı neftlə münbit məntəqələrin bir hissəsi isə İraqın Sünnistan bölməsinə veriləcək. Xəritəyə əsasən, Bağdad Sünnistan bölməsinin ixtiyarında olacaq.