"Çeçenistan və Ukraynadakı müharibə bir-birinə bənzəyir".

Axar.az Chechennews.com-a istinadən xəbər verir ki, bu açıqlama ilə Cövhər Dudayev batalyonunun komandiri, Çeçen İçkeriya Respublikasının generalı İsa Munayev çıxış edib. O, Ukraynadakı hadisələrlə Çeçenistandakıların eyni ssenari üzrə hərəkət etdiyini bildirib:

"Burada olduğu kimi, mənim vətənimdə də tətbiq edilən ssenarini Kremldə yazıblar. İlk növbədə bir qardaş xalqı ayırırlar və düşmən edirlər. Ardınca isə ruslar kömək adı altında buraya gəlir. Ruslar eyni şeyi Çeçenistanda,"Çeçen müharibəsi" zamanı Cövhər Dudayeva qarşı müxalifətə köməyə gələrək etmişdilər. Eyni ssenari Ukraynada da reallaşdırılır. Rejissor isə Kremldə əyləşir. Putin və başkəsənləri mənim xalqımın 300 min günahsız insanını – qadınları, uşaqları, qocaları öldürüb. 42 min günahsız uşaq,təxminən 300 min insan bütün ömrü boyu şikəst qalıb. Bu, milyonlar deməkdir. Başa düşürsünüzmü? Putini belə olan halda necə şəxsi düşmən hesab etməyəsən? O, nəinki mənim xalqımı məhv edib, həm də bizə əziz olan hər şeyi əlimizdən aldı".