Ana səhifə Planet |
Beynəlxalq Jurnalistlərin Müdafiə Komitəsi mətbuatda KİV əməkdaşlarının üstü açılmamış qətlləri haqqında məruzə ilə çıxış edib.
Axar.az RİA Novosti-yə istinadla xəbər verir ki, məruzənin dərci noyabrın 2-də qeyd olunan və BMT-nin ilk dəfə rəsmən elan etdiyi Beynəlxalq "Jurnalistlərə qarşı cinayətlərin cəzasız qalmasına son" günü ərəfəsinə təsadüf edir.
"Jurnalistlərin qətlə yetirilməsinə beynəlxalq diqqətin artmasına baxmayaraq, hökumətlər düşünülmüş qətllərin, eləcə də, canilərin cəzasız qalmasının qarşısını almaq üçün əhəmiyyətli addımlar atmağa qabil deyillər", - deyə beynəlxalq təəşkilatın press-relizində bildirilir.
Məruzədə qeyd edilir ki, son on ildə 370 jurnalist bilavasitə öz peşələri ilə əlaqədar olaylarda qətlə yetirilib. Onların əksəriyyəti korrupsiya, cinayətkarlıq, insan haqları, siyasət və müharibə kimi mövzuları işıqlandıran yerli jurnalistlər olub. Baş vermiş cinayətlərin 90 %-i cəzalandırılmamış qalır: indiyədək müqəssirlərdən heç birinə ittiham hökmü çıxarılmayıb.
Bununla əlaqədar Jurnalistlərin Müdafiə Komitəsi milli hökumətləri və siyasi liderləri jurnalistlərə qarşı hər cür zorakılıq hallarını pisləməyə çağırıb, BMT-yə və hökumətlərarası regional orqanlara üzv dövlətlərin cəzasızlığa qarşı mübarizə sahəsində üzərilərinə götürdükləri öhdəlikləri yerinə yetirmədikdə məsuliyyətə cəlb edilməsi üçün konkret addımlar atmağı təklif edib.
Komitə həmçinin monitorinq aparmaq və bu öhdəliklərin yerinə yetirilməsi gedişi haqqında məruzə etmək çağırışı ilə yerli və beynəlxalq jurnalistlərə müraciət edib.
Tarix
2014.10.29 / 08:30
|
Müəllif
Təhminə C.B.
|