"ABŞ Ukraynadan istifadə elədi".

Axar.az xəbər verir ki, bu sözləri "Miq nyus"a açıqlamasında Ukraynanın kemiş baş naziri Nikolay Azarov söyləyib.

O, artıq Ukraynanın milli maraqlarının qalmadığını bildirib:

"Az adam bilir ki, Yanukoviçlə yanaşı mənə də sui-qəsd təşkil edilmişdi. Mənim həyat yoldaşım getdiyi avtomobildə avtomatdan açılan atəş nəticəsində güllələnmişdi, ancaq möcüzə nəticəsində sağ qaldı. Bu güllələr mənim üçün hesablanmışdı. Buna görə də mənim ölkədən qaçmaqdan başqa şansım qalmamışdı. Mən sizdən soruşmaq istəyirəm ki, pulları hara xərcləyirsiniz? "Qrad"ları haradan alırsınız? Bəs tankları? Ukraynada bütün silah növlərinin olduğu ağzına qədər dolu anbarlar var. Bu silahlarla Ukrayna bütün Avropa ilə 20 il ərzində vuruşa bilər. ABŞ Ukraynadan istifadə elədi. Ona görə də indi Ukraynanı Rusiyanın qarşısına atıb. Mən Rusiya bazarlarında Ukrayna üçün savaşırdım. Ona görə də məni Rusiya yönümlü adlandırırdılar. Avropa ilə biz öz milli maraqlarımızı qorumaqdan ötrü çox mübarizə apardıq. Amma indi heç bir milli maraq-filan qalmayıb. Sən avropalıların qarşısında əyiləndə çoxlu alqış qazana bilirsən, amma ölkən üçün heç bir xeyir götürməyəcəksən. Ona görə də məni həm Rusiyada, həm də Avropada çətin danışıqlar aparan şəxs hesab edirdilər. Səbəb o idi ki, mən yalnız öz milli maraqlarımızı ortaya qoyurdum. Çalışırdım bizim məhsullar onların bazarlarına çıxsın".

Qeyd edək ki, Nikolay Azarov artıq Ukraynada yaşamır. Bu çıxış Azarovun uzun aylardan sonra Ukrayna ilə bağlı dediyi ilk sözlərdi.