"Qərbin Ukraynaya silah verəcəyinə dair onsuz da heç bir təminat yoxdur".

Bu sözləri Axar.az-a açıqlamasında Qərb və ABŞ-ın Ukraynaya silah yardımından imtina etməsini şərh edərkən politoloq Elxan Şahinoğlu deyib.

Politoloq bildirib ki, Ukraynaya silah dəstəyindən imtina etməsinə baxmayaraq, Qərb Kiyevə maliyyə yardımını hələ də davam etdirir:

"Qərbin Ukraynaya silah dəstəyindən rəsmi şəkildə imtina etməsi ondan irəli gəlir ki, Qərb vəziyyəti daha da şiddətləndirmək istəmir. Əgər NATO Ukraynaya silah verməyi qərara alsa, bu, müharibəni daha da alovlandıracaq. Eyni zamanda bu, Rusiyanın əlinə separatçıları silahlandırmağa yeni bir bəhanə verəcək. Məhz bu baxımdan da ABŞ və Avropa ölkələri rəsmi səviyyədə Ukraynaya silah satmamağı qərara alıb. Bu qərar Ukraynanın vəziyyətini elə də çətinləşdirməyəcək. Çünki sovet dövründən Ukraynada çox böyük silah zavodları var və bunlar indi də fəaliyyət göstərir. Düzdür, ölkənin müasir silahlara ehtiyacı var, ancaq sözügedən silahlar separatçılarda da yoxdur. Yəni hər iki tərəf hazırda eyni səviyyədə savaşır. Buna görə də Qərbin Ukraynaya silah dəstəyi verməməsi Ukrayna ordusunun bundan sonra savaşa bilməyəcəyi anlamına gəlmir".

Politoloq sözügedən məsələdə Ukraynanın başqa yollara əl ata biləcəyinin mümkünlüyünü də vurğulayıb:

"Qeyd edim ki, Ukrayna Qərbdən ala bilmədiyi silahları başqa kanallar vasitəsi ilə də əldə edə bilər. Düşünürəm ki, rəsmi Kiyev bunu indi də edir. Çünki hazırda Ukrayna ordusunda bu cür müasir silahlara rast gəlmək mümkündür. Çox güman ki, bunlar da qeyri-rəsmi kanallarla əldə olunur".

Xatırladaq ki, ABŞ, Almaniya və Macarıstan Ukraynanı silahla təchiz etməkdən imtina ediblər.