"Əsəd rejimi son 4 ildə ən zəif nöqtəyə çatıb. Strateji əhəmiyyət kəsb edən Cisr əş-Şuqurun itirilməsi rejimin məhvinin müjdəçisi olacaq".

Axar.az xəbər verir ki, bu iddia ilə nüfuzlu Vaşinqton Post qəzeti çıxış edib.

Dərgidə yer alan təhlilə görə, Suriyada vətəndaş müharibəsinə çevrilən "xalq qiyamı" 4 ili geridə buraxsa da, əməli irəliləyiş yoxdur. Lakin müxaliflərin son həftələrdə əldə etdiyi gözlənilməz irəliləyiş Bəşər Əsəd rejiminin gələcəyini böyük sual altına alıb:

"Müxaliflərin ötən aylarla nisbətdə çox çətinlik çəkmədən bəzi strateji nöqtələri ələ keçirməsi Dəməşq rəhbərliyinin ölkənin böyük hissəsində nəzarəti getdikcə itirdiyini göstərir. Son olaraq İdlib bölgəsindəki Cisr əş-Şuqur şəhərinin tutulması Əsəd rejiminin ölkənin şimali ilə əlaqəsinin tamamilə kəsilməsi ilə nəticələnib".

Qəzetə danışan Səudiyyə analitiki Camal Kaşukci mövzuya münasibət bildirərək Əsədin 2015-ci ili prezident kimi başa vurmayacağını deyib:

"Hazırda bölgədə ciddi bir oyunçu var və o, müvəffəqiyyət qazanır. Güman edirəm ki, Əsəd rejiminin sonunun gəldiyini görəcəyik".

Qərb diplomatları da "Post"a danışaraq Əsəd rejiminin getdikcə daxildən parçalandığını, İranın ciddi dəstəyinə baxmayaraq, məğlubiyyətə düçar olduğunu deyiblər. ABŞ-ın Suriyada səfiri olmuş Robert Ford isə Əsədin pillə-pillə geri çəkildiyini deyib.