Əl Qaidənin 2011-ci ildə öldürülən lideri Üsamə bin Ladenə məxsus yeni səs qeydləri yayımlanıb.

Axar.az xəbər verir ki, yayılan səs yazılarında Bin Ladenin Hindistan müstəqillik hərəkatının lideri Mahatma Qandininin mübarizəsindən təsirləndiyi əks olunub.

"İnternəşln Biznes Taym"ın xəbərinə görə, Bin Ladenin bu çıxışı 1993-cü ilə təsadüf edir. Onun müsəlmanlara ABŞ məhsullarını boykot etmə çağırışı Qandinin Böyük Britanyaya qarşı çağırışını xatırladır. Təşkilat lideri qeydlərdə tez-tez Qandidən sitat gətirərək mübarizə strategiyasında hind liderdən nümunə götürməyə çalışıb.

80-ci illərin sonu, 1990-cı illərin əvvəllərində yazılan səs qeydlərində diqqət çəkən digər maraqlı məqam isə Bin Ladenin çıxışında ABŞ-a qarşı o qədər də nifrət hiss olunmamasıdır.

Ümumilikdə bu günə kimi Bin Ladenin 1500 səs qeydi yayılıb.