İran İslam İnqilabı Keşikçiləri Korpusu (SEPAH) Suriyada döyüşdən imtina edən əsgərləri hərbi tribunala çıxarır.

Axar.az xəbər verir ki, bu barədə "Aşarq Alavsat" qəzeti məlumat yayıb. Xəbərə görə, Tehran Suriyada döyüşməkdən imtina edən xeyli hərbçini cəzalandırmaq niyyətindədir.

Qəzetin etibarlı qaynaqlardan əldə etdiyi məlumatda bildirilir ki, son zamanlar SEPAH sıralarında narazılıq baş qaldırıb, əsgərlər Suriyada terrorçulara qarşı döyüşmək istəmir. Buna görə də SEPAH rəhbərliyi "əmrə tabe olmama", "vətənə xəyanət" maddələri ilə kütləvi şəkildə hərbçilərə cinayət işi açıb.

Korpusun xarici əməliyyatlar bölümü olan Qüds Qüvvələrinin son zamanlarda Suriyada böyük itkilər verməsi hərbçilər arasında ruh düşkünlüyü ilə əlaqələndirilir. Bu vəziyyət Tehran rəhbərliyini bərk narahat edir.

Xatırladaq ki, SEPAH-ın sözçüsü Hüseyn Salami ötən həftə Suriyada verilən itkilərə görə Dəməşqə əlavə hərbi məsləhətçilər göndəriləcəyini açıqlamışdı.