Davos Dünya İqtisadi Forumunun təhlükəsizliyinə cavabdeh olan isveçrəli hərbçilər narkotik vasitələrdən istifadə edib.

Axar.az xəbər verir ki, bu barədə İsveçrənin "Tages-Anzeiger" qəzeti məlumat yayıb.

Məlumata görə, 12 əsgərdən 7-si çətənə, 5-i isə kokaindən istifadə edib. İsveçrə ordusunun sözçüsü Ştefan Hofer məlumatı təsdiqləyib. Onun sözlərinə görə, çətənədən istifadə edən əsgərlər 10 günlük həbs olunublar və 490 dollar cərimələniblər.

Sözçü kokain qəbul edən əsgərlərinsə tərxis olunacağını və mülki məhkəməyə veriləcəyini açıqlayıb.

Qeyd edək ki, Davos Dünya İqtisadi Forumu yanvarın 20-də başlayıb və bu gün sona çatacaq. Forumda bir çox ölkənin prezidenti iştirak edib.