Rusiya və Türkiyə uçurumun bir addımlığındadır.

Axar.az xəbər verir ki, bu haqda politoloq Elxan Şahinoğlu açıqlama verib.

Siyasi şərhçinin qənaətinə görə, Rusiya Suriyada hərbi varlığını artıracaq:

"Rusiyanın Suriyada hərbi varlığını artırması nəticəsində Türkiyəyə qaçqın axını artacaq. Əsəd və Putin daim Türkiyəni ittiham edirlər. Ancaq sual olunmur ki, Türkiyə 2 milyon yarım suriyalı qaçqına milyardlarla dollar xərcləməyə borcludurmu? Suriyada bombardmanlar həyata keçirən Rusiya özü nə qədər suriyalı qaçqın qəbul edib? Ona görə də belə bir vəziyyətdə Türkiyənin müttəfiqləri ilə birgə Suriyanın bir hissəsində quru əməliyyatı həyata keçirməkdən başqa alternativi qalmır".

Politoloq hesab edir ki, Türkiyənin Suriyada quru əməliyyatlarına başlaması olduqca mürəkkəb prosesdir:

"İndi əsas məsələ Türkiyə ordusunun nə vaxt və hansı şərtlər daxilində Suriyanı tərk edəcəyidir. Çünki Suriyada müharibəni şərtləndirən səbəblər uzun illər davam edəcək. İkincisi, Rusiya Türkiyə tərəfindən vurulan hərbi təyyarəsinin intiqamını almaq üçün hazırda pusqudadır. Başqa sözlə, Türkiyə və Rusiya hərbçiləri Suriyada üz-üzə qalaraq bir-birlərinə qarşı zərbələr endirəcəklər".