Ukrayna Prezidenti Vladimir Zelenski Kiyevin KXDR-dən Rusiya tərəfində münaqişədə iştirak edəcək 6 min əsgərdən ibarət iki briqadanın hazırlanması barədə məlumatlara malik olduğunu bildirib.

Axar.az Publika.az-a istinadən xəbər verir ki, Zelenskinin axşam müraciəti onun Teleqram kanalında yayımlanıb.

"Şimali Koreyadan iki hərbi hissənin - bəlkə də hər biri altı min nəfərdən ibarət iki briqadanın hazırlanması barədə məlumatımız var", - Zelenski deyib.

Onun sözlərinə görə, hadisələrin bu cür inkişafı Ukrayna üçün çağırışdır, lakin Kiyev buna necə cavab verəcəyini bilir. Ukrayna lideri həmçinin respublikanın tərəfdaşlarını bu çağırışdan gizlənməməyə çağırıb.

Qeyd edək ki, Şimali Koreyanın Rusiyaya əsgər göndərdiyi və onların təlim keçdiyi, ilin sonuna qədər döyüşlərə girəcəkləri barədə uzun müddətdir məlumat yayılır.