Dekabrın 3-də BMT Təhlükəsizlik Şurasının sessiyası zamanı Rusiya və ABŞ nümayəndələri Suriyada vəziyyətin gərginləşməsi ilə bağlı mübahisə edib.

Axar.az xəbər verir ki, bu barədə “Röyters” məlumat yayıb.

Bildirilib ki, mübahisəyə səbəb ABŞ-ın BMT-dəki daimi nümayəndəsinin müavini Robert Vudun çıxışı olub. Vud Suriyada davam edən döyüşlərin eskalasiyasını azaltmağa və mülki əhalinin müdafiəsinə çağırıb, həmçinin üsyançıların hücumuna “Heyət Təhrir əş-Şam”ın rəhbərlik etməsindən narahatlığını ifadə edib.

“Heyət Təhrir əl-Şam”ın ABŞ və BMT tərəfindən terror təşkilatı kimi tanınması Əsəd rejimi və onun Rusiya himayədarlarının növbəti vəhşiliklərinə haqq qazandırmır”, - Vud deyib.

O, Əsəd qüvvələri və Rusiyanın məktəblərə və xəstəxanalara hücum edərək, mülki vətəndaşların itkisinə səbəb olduğunu xatırladıb.

Rusiyanın BMT-dəki daimi nümayəndəsi Vasili Nebenzya isə buna kəskin reaksiya verib:

“Suriyanın dinc şəhərlərində mülki əhaliyə qarşı həyata keçirilən açıq terroru pisləmək üçün cəsarətinizi toplaya bilmədiniz. Vaşinqtonun beynəlxalq terrorizmlə səmimi mübarizəyə nə vaxtsa hazır olacağına dair heç bir illüziya yoxdur. Düzünü desəm, hazırda sizinlə barrikadaların əks tərəflərində olduğumuzdan məmnunuq”.

Vud cavab olaraq Nebenziaya “bu mövzuda bizə mühazirə oxuya bilməzsiniz, çünki Moskva dünyada terrorizmə sponsorluq edən rejimləri dəstəkləyir” deyə bildirib.

Qeyd edək ki, Suriyada bir neçə ildir davam edən nisbi sakitlik başa çatıb, üsyançılar Hələb və İdlibi ələ keçirib, Həmaya hücum edib və rejim qüvvələri ilə şiddətli döyüşlər gedir.