ABŞ Prezidenti Donald Tramp və Ukrayna Prezidenti Vladimir Zelenskiyə Ağ Ev danışıqlarından sonra verilməli olan nahar menyusunun fotosu dərc edilib.

Axar.az xəbər verir ki, bu barədə Ağ Evin Aparat rəhbərinin müavini Den Skavino X səhifəsində paylaşım edib.

Məlumata görə, menyuda məzə olaraq bal sousu ilə pomidor salatı, əsas yemək üçün qulançar, göyərti və rozmarinlə bişmiş toyuq, kərəviz kökü püresi, desert üçün giləmeyvə çeşidi və nazik xırtıldayan sitrus peçenyeləri ilə krem brülesi nəzərdə tutulub.

Qeyd edək ki, Ağ Evdə ötən gün ABŞ və Ukrayna liderləri Donald Tramp və Vladimir Zelenski arasında baş tutan görüş olduqca gərgin keçib və tərəflər ictimaiyyət önündə mübahisə ediblər. Daha sonra qapalı davam edən görüş də yarımçıq kəsilib, Zelenski Ağ Evi erkən tərk edib, birgə mətbuat konfransı və Ukrayna ilə təbii sərvətlərlə bağlı hazırlanmış sazişin imzalanması ləğv edilib.