Rusiyaya kütləvi PUA hücumu Kiyev tərəfindən ABŞ və Ukrayna nümayəndə heyətlərinin martın 11-də Səudiyyə Ərəbistanında keçiriləcək görüşündə döyüşkən mövqeyini nümayiş etdirmək məqsədilə təşkil olunub.

Axar.az xəbər verir ki, bunu rusiyalı politoloq Andrey Koşkin deyib.

Politoloq Ukrayna ordusunun fəallığını Vladimir Zelenskinin iştirak etdiyi siyasi hadisələrlə əlaqələndirdiyini bildirib:

“Mən əminəm ki, bu hücum əvvəlcədən hazırlanıb. Bu gün ABŞ nümayəndə heyəti ilə görüşən Ukrayna tərəfi dinc hədəflərimizə qarşı terror hücumlarının belə artmasına hazırlaşıb. Bu da yəqin ki, Ukrayna nümayəndə heyətinin Səudiyyə Ərəbistanında mövqeyini göstərməklə bağlıdır. ABŞ Dövlət katibi Marko Rubio artıq bu görüşün nəticələrinin proqnozu barədə deyib ki, onlar Ukraynadan hər hansı irəliləyişli təkliflər gözləmirlər”.

Qeyd edək ki, bu gün səhər saatlarından Rusiyaya kütləvi PUA hücumu edilib. PUA hücumu Moskvada 2 nəfərin ölümünə, 18 nəfərin yaralanmasına səbəb olub, böyük dağıntılar qeydə alınıb.

Eyni zamanda bu gün Ciddədə ABŞ-Ukrayna danışıqları başlayıb.