Pakistan təhlükəsizlik qüvvələri ekstremist “Bəlucistan Azadlıq Ordusu”nun yaraqlıları tərəfindən qatarda girov saxlanılan 450 sərnişindən 104-nü azad edib.

Axar.az xəbər verir ki, bu barədə “Geo” telekanalı məlumat yayıb.

Azad edilənlər arasında 15 uşaq və 31 qadın var.

Girovların xilas edilməsi əməliyyatı davam edir və relyefə görə çətinləşib. Təhlükəsizlik qüvvələri ekstremistlərin əlində olan vətəndaşlara zərər verməmək üçün son dərəcə ehtiyatlı hərəkət edir. Əməliyyat tədbirləri zamanı hücumda iştirak edən 16 yaraqlı məhv edilib.

Qeyd edək ki, ötən gün Pakistanda yaraqlılar Kvettadan Pişəvərə gedən qatarda 450 sərnişini girov götürüblər. Ekstremistlər dəmiryol relslərini partladıb, daha sonra qatara atəş açıblar. Qatarın maşinisti yaralanıb. Hücum zamanı qatarın təhlükəsizlik işçiləri ilə silahlılar arasında atışma baş verib.