13:33

Rusiya və Türkiyə prezidentləri Vladimir Putin və Rəcəb Tayyib Ərdoğan arasında telefon danışığı olub.

Axar.az xəbər verir ki, bu barədə Kremlin mətbuat xidməti məlumat yayıb.

Liderlər Rusiya və ABŞ ekspert qruplarının Ər-Riyadda bu yaxınlarda apardığı məsləhətləşmələrin nəticələrini müzakirə edib, Qara dəniz təşəbbüsünün, taxıl müqaviləsinin bərpası, enerji sektorunda layihələr ətrafında fikir mübadiləsi aparıblar.

Rəcəb Tayyib Ərdoğan Rusiya-Amerika dialoqunu dəstəklədiyini və Türkiyə tərəfinin Qara dəniz sazişinin irəliləyişini asanlaşdırmağa hazır olduğunu bildirib.

Putin və Ərdoğan ikitərəfli münasibətlərin müsbət dinamikasını və qarşılıqlı ticarətin artımını məmnunluqla qeyd ediblər.

“Liderlər Suriyada mövcud vəziyyəti müzakirə edərkən ölkənin birliyinin, suverenliyinin və ərazi bütövlüyünün təmin edilməsinin vacibliyini, daxili siyasi sabitliyin möhkəmləndirilməsi, əhalinin bütün etnik və dini qruplarının qanuni hüquq və mənafelərinə hörmət edilməsi üçün onun hakimiyyət orqanlarına və xalqına hər cür köməklik göstərilməsinin lazım olduğunu vurğulayıblar”, - Kremlin məlumatında deyilir.

Rusiya prezidenti Türkiyə liderinə Kiyevin Rusiyanın enerji infrastrukturuna davamlı zərbə vurmaq cəhdlərindən danışıb.

Putin telefon danışığında həmçinin Ərdoğanı və bütün türk xalqını müqəddəs Ramazan ayı və qarşıdan gələn Fitr bayramı münasibətilə təbrik edib.