ABŞ-dan 15 milyard dollara 10 ədəd “Patriot” hava hücumundan müdafiə sistemi almağa hazırdır.

Axar.az xəbər verir ki, bunu Ukrayna Prezidenti Vladimir Zelenski deyib.

“Bir sistem 1,5 milyard dollara başa gəlir, biz almağa hazırıq. Yalnız mülki olanları, insanların sıx olduğu şəhər mərkəzlərini və bəzi şəhərləri bağlamaq üçün ən azı 10 sistem lazımdır. Biz bu 15 milyardı ödəməyə hazırıq. Bu pulu tapacağıq, hamısını ödəyəcəyik”, - Zelenski bildirib.

Zelenskinin sözlərinə görə, o, ABŞ Prezidenti Donald Tramp administrasiyasından “Patriot” sistemləri və raketlərinin istehsalı üçün lisenziya istəyib.

Onun sözlərinə görə, elə ölkələr var ki, onlarda “Patriot” sistemləri mövcuddur, lakin həmin ölkələrdə hərbi əməliyyatlar aparılmır:

“Bu sistemlər Ukraynaya verilməlidir. Hətta onları icarəyə götürməyə də hazırıq. Bu və ya digər ölkədə hansısa problem olarsa, onları çox tez geri qaytarmaq lazım gələrsə, biz onları geri qaytaracağıq”.