Avropada ABŞ Prezidenti Donald Trampla Rusiya lideri Vladimir Putin arasında baş tutan danışıqların nəticələri və hansı mövzularda razılıq əldə edildiyinə dair təsvirlər "şok effekt" yaradıb.

Axar.az xəbər verir ki, bu barədə “Faynənşl Tayms” nəşri yazıb.

Nəşr qeyd edib ki, Putinlə söhbətindən dərhal sonra Tramp onun məzmunu barədə Ukrayna Prezidenti Vladimir Zelenskiyə, eləcə də Böyük Britaniya, Fransa, Almaniya, İtaliya, Finlandiya və Avropa Komissiyasının rəhbərlərinə məlumat verib.

Almaniyanın yeni təyin olunmuş kansleri Fridrix Merz bildirib ki, söhbətdə iştirak edən bütün tərəflər Ukraynanı atəşkəsə doğru yolunda sıx şəkildə dəstəkləməyə hazır olduqlarını təsdiqləyiblər.

Vurğulanıb ki, Putin və Tramp arasında danışıqlar ötən həftə Rusiya hökumətinin Türkiyədə keçiriləcək danışıqlarda iştirakdan imtina etməsi fonunda baş tutub. Halbuki bu danışıqlara elə özü təşəbbüs göstərmişdi. Həmin vaxt ABŞ prezidenti bildirmişdi ki, o və Putin şəxsən görüşmədikcə, heç nə baş verməyəcək.

“Avropa paytaxtlarında liderlər Trampın Putinin maksimalist tələblərini təmin edəcək və Ukraynanın maraqlarını qurban verəcək bir razılaşma imzalaya biləcəyindən ehtiyat edirlər. Çünki Tramp döyüşlərin dayandırılmasına tələsir”, - FT vurğulayıb.