01:34

İyunun 3-də Ukraynanın Zaporojye və Xerson vilayətlərinin işğal olunmuş ərazilərinə irimiqyaslı PUA hücumları həyata keçirilib.

Axar.az xəbər verir ki, bu barədə Teleqram kanalları məlumat yayıb.

Məlumata görə, hücum nəticəsində Melitopol şəhəri də daxil olmaqla, bir çox yaşayış məntəqəsində elektrik enerjisinin verilişi dayandırılıb.

Rusiya Teleqram kanalları yazır ki, Ukrayna PUA-ları tərəfindən yüksək gərginlikli avadanlıqların vurulmasından sonra Zaporojye bölgəsi işıqsız qalıb.

Zaporojye vilayətinin “qubernatoru” Yevgeni Balitskinin sözlərinə görə, Ukrayna ordusunun hücumu nəticəsində vilayətin şimal-qərb hissəsində yüksək gərginlikli avadanlıqlar sıradan çıxıb. Vilayətin bütün ərazisində elektrik enerjisi kəsilib.

Elektrik enerjisinin kəsilməsi 600 min insanın yaşadığı 457 yaşayış məntəqəsinə təsir edib.

Xerson vilayətinin bir hissəsi də Ukrayna ordusunun hücumu səsəbindən işıqsız qalıb.

Xerson vilayətinin Geniçesk və Zaporojye vilayətinin Melitopol rayonlarında yarımstansiyalar sıradan çıxarılıb.

Geniçesk, Novotroitski, İvanovski və Nijneseroqozski rayonlarında 150 yaşayış məntəqəsi işıqsız qalıb. Bu, 104 min nəfərdən çox əhalinin işıqsız qalması deməkdir.

Rusiya Teleqram kanalları yazır ki, bu, 2022-ci ildən bəri işğal olunmuş ərazilərə vurulan ən böyük zərbədir.