Turizmin cazibə mərkəzi Trabzon Türkiyənin Qara dəniz bölgəsinin Qara dəniz hissəsində yerləşir.

Axar.az Sey-yah.com-a istinadən xəbər verir ki, bura tarixi və təbii gözəllik aşiqləri üçün ideal yerdir. Türkiyənin 29-cu ən böyük şəhəri olan Trabzon həm də bu ölkədə çayın istehsal olunduğu yerlərdəndir.

Batumi Türkiyə sərhədindən 12 kilometr məsafədə yerləşdiyi üçün burdan Trabzona getmək çox vaxt və pul tələb etmir. Batumi avtovağzalından hər səhər saat 9:00-dan etibarən Trabzona mikroavtobuslar yola düşür (Adambaşına 20 gürcü larisi – 14 AZN – red.). Vaxta gəlincə, yol təxminən 5 saatınızı alacaq.

Trabzonda harda qalmaq olar?

Trabzon Türkiyənin ən bahalı şəhərlərindədir. Əgər pulunuza qənaət etmək istəyirsinizsə, bir qədər diqqətli olmalısınız. Məsələn, qalacağınız yerə çox pul xərcləmək istəmirsinizsə, onda oteldə yox, qışda tələbələr, yayda da turistlər üçün nəzərdə tutulan yaşayış binalarında gecələməniz məsləhətdir (Həmin yaşayış binalarından birində tutduğumuz mənzilə 4 gecə 5 gün üçün 400 türk lirəsi ödədik – 220 AZN – red.). Tələbə şəhərciklərindəki binalar sakitlik və təmizlik baxımından çox sərfəlidir. Düşünün ki, bütöv bir ev sizin ixtiyarınızdadır, üstəlik çox ucuz qiymətə. Binada qalmaq həm də ona görə sərfəlidir ki, əgər hər gün restoranlara sərf edəcək pulunuz yoxdursa, onda evdə özünüz bişirib yeyə bilərsiniz.

Ən yaxşı ev sahibi Süleyman…

Trabzona səfər zamanı həm ucuz, həm də xidmət səviyyəsi yaxşı olan "Zoviyahill Vayt" otelində qala bilərsiniz. Günün istənilən saatında köməyinizə qaçan Süleyman Aslandağın isə ən yaxşı ev sahibi olduğu heç kəsə sirr deyil.

Şəhərdə gəzmək üçün taksilərdən istifadə etməsəniz yaxşıdır. İntervalı heç 1-2 dəqiqə olmayan marşrutlar (dolmuş) sizi lazım olan ünvana 1 lirə 75 quruşa (0,96 AZN – red.) aparacaq. Halbuki məsafədən asılı olmayaraq taksiyə 15 lirə (8 AZN – red.) ödəmək məcburiyyətindəsiniz.

Qaradənizlilərin piknik yeri, dadlı samavar çayı, Trabzona təpədən baxdıran- Boztəpə

Bura adından da göründüyü kimi şəhər mərkəzindən 3 km yuxarıda yerləşir. Boztəpə də bütün Trabzon ovcunun içindəymiş kimi görünür. Trabzonun bu məşhur yerinə qaradənizlilər şəhəri seyr etmək, təmiz hava qəbul etmək və piknik üçün gəlir. Boztəpənin samavar çayı da məşhurdur. Əgər bu yerə getmək qərarına gəlmisinizsə, Boztəpənin tanınmış samavar çayını içmədən geri dönməyin.

Qızlar monastrı

Boztəpəyə çox yaxın olan bu tarixi məkan bərpa işləri üçün müvəqqəti olaraq qapalıdır. Amma monastra içinə girməmək şərtilə baxmanızda heç bir problem yoxdur. Belə bir deyim də var ki, Qızlar monastrı yerləşdiyi yerə görə şəhərə hakim mövqedədir. Monastr 14-cü əsrdə rum kralı III Aleksios tərəfindən tikdirilib. Bura ən son 1923-cü ildə istifadə olunub.

Trabzonun gizli cənnəti – Uzungöl

Trabzonun gəziləcək yerlərinə həm mikroavtobuslarla, həm də turla getmək mümkündür. Amma turla getmək daha məsləhətlidir. Tur həm qiymət baxımından sərfəlidir (turun 1 nəfər üçün qiyməti 30-35 lirə – 16-19 AZN – red.), həm də ödədiyiniz məbləğə bir deyil, bir neçə yerin gəzdirilməsi daxildir.

Yeri gəlmişkən, sözügedən tur şirkətlərinin birindən faydalanıb, Uzungölə tərəf yola düşdük. Tur şirkətinin bizə təqdim etdiyi ilk yer Sürmene bıçaq bölməsi oldu. Burda əl işi olan bıçaqlara həm baxmaq, həm də almaq mümkündür. Növbəti dayanacağımız isə Uzungöl yolu üzərində yerləşən Kiremitli körpü oldu. Bu körpü 1935-ci ildə böyük ağac kötüklərdən tikilib. Körpünün qayalara bitişik olması və kirəmitdən hazırlanan damı bura xüsusi gözəllik verir. Bura əvvəllər "Hapsiyaş körpüsü" adlandırılıb.

Kirəmitli körpünün ardınca yollandıq Uzungölə…Dillərə dastan olan bu göl Trabzonun Çaykara rayonunda yerləşir. Uzungöl həm də gölün ətrafındakı kəndin adıdır. Göl Trabzonun mərkəzindən 99 km aralıdadır. Bu göl dağ yamaclarından düşən qaya parçalarının Haldizen dərəsinin qarşısını kəsməsi nəticəsində yaranıb.

Onu da deyim ki, yol boyu Trabzonun bu hissəsinin bənzərsiz təbiəti və dəyişkən havasının şahidi olduq. Təsəvvür edin ki, burada hər kilometrdən bir hava dəyişir. Yəni əgər bir ərazidə yağış yağırsa, bir neçə dəqiqə sonra maşınla keçdiyiniz digər ərazidə yağış görməyə bilərsiz. Göl isə sözlə ifadə edilə bilməyəcək qədər gözəldir. İlin əksər aylarında yağmurlu havası olan ərazidə, üstəlik duman bürümüş Soğanlı və Qaçqar sıradağlarının kəsişməsində yerləşən göl başqa necə ola bilərdi ki?

Uzungölün simvolu bütün rəsmləri bəzəyən məscidləri sayılır. Burada hər biri fərqli memarlıq üslubuna malik olan 3 məscid var. Bunlardan ən məşhuru Uzungölün mərkəzindəki məscid sayılır.

Uzungöl əhalisi daha çox turizmdən əldə etdiyi gəlir hesabına dolanır. Elə bu səbəbdən onların əksəriyyəti öz mənzilini pansionata çevirib. Mənzillərə gəlincə, mənzərəsi dumanlı dağlar, möhtəşəm göl, bənzərsiz təbiətə açılan əsl kənd evlərində yaşamağa dəyər.

Qeyd edək ki, Atatürk həyatı boyu Trabzona 3 dəfə gedib. Sonuncu dəfə Trabzonu 1937-ci ildə ziyarət edib və hazırda Trabzon Atatürk köşkü adlanan yerdə vəsiyyətini yazmağa başlayaraq, bütün əmlakını türk xalqına bağışlayıb.