Qan ağlamaq ifadəsinə adətən şeirlərdə və hüznlü hekayələrdə, hərəkət formasında isə qorxu filmlərində rastlaşmışıq.

Axar.az xəbər verir ki, bu ifadə böyük bir üzüntü içində olmaq mənası daşısa da, gözlərdən qan axması hallarına təsadüf olunur. Qanlı göz yaşı hemolakriyanın əsas əlamətidir. Bu çox nadir rastlanılan haldır.

Ən son 2015-ci ildə çox güclü baş ağrısından əziyyət çəkən bir kişinin qanlı göz yaşı tökdüyü müşahidə edilib. Lakin burada önəmli bir detal da var. Xəstənin eyni zamanda ağzından və burnundan da qan gəlib ki, bu hadisə həkimlərin təəccübünə səbəb olub.

Alimlər öz-özünə əmələ gələn və insanların qanlı göz yaşı tökməsinə səbəb olan hemolakriyanın səbəbini tamamilə aydınlaşdırmaq üçün araşdırmaları davam etdirsələr də, hələli araşdırmalar sadəcə bir neçə ipucu verib.

1991-ci ildə aparılan bir elmi araşdırmada hemolakriyanın qadınların uşaq dünyaya gətirməsi ilə bağlı olduğu irəli sürülüb.

Araşdırmada 125 sağlam fərd arasında kişilərin 8 faizinin, hamilə qadınların isə 7 faizinin göz yaşlarında qan aşkarlanıb. Menopauza sonrası isə qadınların heç birinin göz yaşında qan təsbit edilməyib.

Bu vəziyyətə infeksiya, yaxud hər hansısa zədələnmənin də səbəb ola biləcəyi ehtimal edilir. "Bakteriya konyunktivitləri" adlandırılan xoşxasiyyətli göz infeksiyası da qanlı göz yaşına səbəb olur. Lakin müalicədən sonra aradan qaldırılır.