Əhalinin sağlamlığının qorunmasına yönələn icbari dispanserizasiya prosesi may ayının əvvəllərində yekunlaşacaq.

Bu barədə "Axar.az"a Səhiyyə Nazirliyinin mətbuat xidmətinin rəhbəri Anar Qədirli məlumat verib. Onun sözlərinə görə, hazırda dispanserizasiyanın nəticələri araşdırılır və yaxın günlərdə ətraflı məlumat veriləcək.

Qeyd edək ki, "Uşaqların icbari dispanserizasiyası haqqında" qanunun qəbulu ilə 6 məktəb yaşlı uşaqlar da bu ildən bu prosesə qoşulub. Fevralın 17-dən isə 18 yaşdan yuxarı əhalinin tibbi müayinələrdən keçirilməsinə başlanılıb.

Suraxanı Rayon İcra Hakimiyyətindən verilən məlumata görə, bu günə qədər rayonda 160 minə yaxın vətəndaş və 123-dən çox kollektiv tibbi müayinədən keçib. Vətəndaşların 10 min 520 nəfəri rentgen, 39 min 983 nəfəri laboratoriya müayinəsindən, 6 min 475 nəfəri USM aparatından və 4 min 414 nəfəri EKQ müayinəsindən keçib. 3 min 801 nəfər vətəndaşda müxtəlif xəstəliklər aşkarlanıb, onlardan 391 nəfər stasionar müalicəyə qəbul olunub.

Təkcə 24 sayli Birləşmiş Şəhər Xəstəxanasına müraciət edən vətəndaşlardan 74 nəfərində xəstəliyin ağır forması aşkarlandığından stasionar müalicəyə cəlb olunublar.