İngiltərədə aparılan araşdırmalar nəticəsində orucun yeni yaranan beyin hüceyrələrinin böyüməsini təmin etdiyi və beyni gücləndirdiyi məlum olub.

Axar.az xəbər verir ki, bu barədə türkiyəli qidalanma və diyet mütəxəssisi Melisa Karataş məlumat verib.

O bildirib ki, oruc tutarkən qanımızda qrelin (aclıq) hormonu artır:

“Qrelin hormonu beynin öyrənmə və yaddaşla əlaqəli hissəsi olan hipokampusla qarşılıqlı əlaqədə olur və onu yaxşılaşdırır. Bu hormon beyin-qan baryerini keçə bilən nadir hormonlardan biridir. Oruc tutmaq uzun müddət ac qalmağı tələb etdiyi üçün bu hormon oruc tutanların qanında çox olur. İnsan bədənində beyin hüceyrələri bir neçə həftəyə əmələ gəlir. Qrelin hormonunun təsirlərinin aydın görünməsi üçün həftələrlə oruc tutmaq lazımdır.

Oruc zamanı beyin normal halda istifadə etdiyi enerji mənbəyi olan qlükoza yerinə yağları parçalayaraq enerji olaraq ketonlardan istifadə edir. Ketonlar həmçinin beyin üçün səmərəli enerji mənbələridir. Bunlar daha çox enerji yaratmaq üçün enerji istehsal mərkəzləri olan mitoxondrilərin sayını artırır. Mitoxondrilərin çoxalması orqanizmin cavanlaşması deməkdir.

Oruc tutmaq orqanizmdə sinir hüceyrələrinin yenilənməsini və bərpasını təmin edən BDNF zülalını artırır. Bu sizi xroniki nevroloji xəstəliklərdən qoruyur, həm də yaddaşınızı gücləndirir”.