Mədəniyyət Nazirliyinin nəzdindəki Bədii Şuranın “Məhsəti” qısametrajlı filminin Bakı Film Festivalında nümayişinə qoyduğu qadağa geniş müzakirələrə səbəb olub.

Rəsmi açıqlamada bildirilib ki, filmdə Məhsəti Gəncəvinin obrazı təhrif olunur, etik-normativ çərçivələr pozulur və şairənin ideya-mənəvi irsi ilə ziddiyyət təşkil edən səhnələrə yer verilir. Şura həm manipulyativ təqdimatları, həm də kontekstdənkənar mənalandırma cəhdlərini əsas gətirərək filmə lisenziya verilməsini məqsədəuyğun saymayıb.

Kult.az xəbər verir ki, Modern.az məsələ ilə bağlı filmin rejissor və ssenari müəllifi, sabiq mədəniyyət naziri Əbülfəs Qarayevin qızı Suad Qarayeva ilə əlaqə saxlayıb.

Suad Qarayeva Bədii Şuranın qərarını təəssüflə qarşıladığını bildirib:

“Əlbəttə, film üzərində çalışanda birinci öz yerli auditoriyanı fikirləşirsən, öz yaxınlarını. Nəsə təzə bir şey etməyə çalışırsan ki, sonra ona baxan tamaşaçı öz rəyini bildirsin. Bu rəylər həmişə pozitiv olmaya bilər, amma yenə də nə qədər müzakirə varsa, o qədər yaxşıdır - diskussiya sənət üçün vacib prosesdir. Hamımız ondan nəsə öyrənirik. Bakı Festivalının komandası ilə də ünsiyyətdə idim, təəssüf olsun ki, lisenziyasız göstərə bilmirlər”.

O, sosial mediada tənqidlərə də cavaba verib:

“Birinci fikirlərimi özüm yazdım, çünki film ilk öncə rejissorun və prodüserlərin öhdəliyidir. Fikirləşirəm ki, sənətin hər hansı formasına Şura baxışı bizi incəsənət baxımından geri saxlayır”.

Rejissor tənqid olunan obrazla bağlı qeyd edib ki, Məhsəti Gəncəvini canlandıran Mina adlı gənc teatr aktrisasıdır:

"O, səhnədə Məhsəti rolunu oynamaq istəyir və Məhsətinin öz şeirlərindən ilhamlanır. Bu film Məhsəti Gəncəvinin həyatı haqqında sənədli film deyil. Onun şeirləri bütün toplularda var - hamı artıq kitab almadan belə internetə girib oxuya bilər. Onun o vaxta görə bu qədər cəsur və azad poeziyası məni daha azad qadın obrazı yaratmağa ilhamlandırıb. Müasir gənclər, özlərini sərbəst hiss edən, həm sənətdə, həm də həyatlarında seçimlərini özləri edən obrazlar mənə maraqlıdır. Dünya kinosunda bu heç də təzə fikir deyil — müasir çağda, müasir gənclərin ritmində yaradılmış bir filmdir. Məhsəti Gəncəvi də görün min il qabaq necə şeirlər yazıb ki, bu günə qədər hamını heyrətə gətirir”.

Suad Qarayeva onu da vurğulayıb ki, film başqa beynəlxalq festivallarda nümayiş olunacaq:

“Film artıq ABŞ-da Mammoth Lakes Film Festivalında nümayiş olunub. Bizim çox istedadlı aktrisamız Fərqanə Abdullayeva Milan “Independent Film Awards”da “Best Actress” mükafatını alıb. Fevralda film Londonda festivalda olacaq. Ondan sonrasını isə artıq filmin distribütorları, Origine Films müəyyən edəcək”.