29 martda İstanbulda müalicə aldığı xəstəxanada vəfat edən 78 yaşlı xalq artisti Rasim Balayevin sosial şəbəkələrdə ən çox paylaşılan baməzə söhbətlərin biri də İTV-nin “Ötən günlər” verilişində danışdığı bir xatirəsidir.

Kult.az xəbər verir ki, Rasim Balayev “Dədə Qorqud” filmi çəkilərkən (o filmdə Beyrək obrazını yaradıb) filmin bəstəkarı Emin Sabitoğluya mahnıları da ifa etməsini təklif etdiyini bildirir.

Emin Sabitoğlunun etirazına isə Rasim Balayev deyir: “O qədər ölü oldum ki, Yalçın Rzazadə kimi oxuya bilmədim?”

Rasim Balayevin “Emin Sabitoğlu dedi ki, sən lap qudurmusan” sözləri ilə gülüşə çevrilən bu xatirə mərhum xalq artistinin ifasını önə çıxarıb. R.Balayev mahnı da ifa edə bilib?

R.Balayevin qiraətçi olduğu, bir çox filmlərin səsləndirməsində iştirak etdiyi məlumdur. O cümlədən, 1977-ci ildə çəkilən “Ad günü” filmində də R.Balayev Fuad Poladovun oynadığı Nazim obrazını səsləndirir.

Ancaq yalnız R.Balayevin ölümündən sonra məlum olur ki, “Ad günü” filminin qəhrəmanlarından olan Əlinin (rolu Davud Uplisaşvili oynayıb) sonda ifa etdiyi mahnını (“Pəncərədən daş gəlir...”) Rasim Balayev oxuyub. Halbuki Əlini (Davud Uplisaşvili) səsləndirən mərhum aktyorumuz Şahmar Ələkbərovdur.

R.Balayevin daha bir ifası isə bu gün sosial şəbəkələrdə yayılıb. Bu görüntülərdə Rasim Balayevin “Ay Laçın” mahnısını ifa etdiyi görünür. Kadrda bir çox ünlü sima, o cümlədən Oskar laureatı Rüstəm İbrahimbəyov da görünür. R.Balayev R.İbrahimbəyovun sədrlik etdiyi Konematoqrafçılar İttifaqının uzun illər katibi olub.

Sözügedən kadrları təqdim edirik: