Xalq artisti Rasim Balayevin vəfatı fonunda sosial şəbəkədə müzakirələr, paylaşımlar davam edir. Belə paylaşımlardan birini də jurnalist Məhərrəm Əliyev edib. O, paylaşımında vida mərasimində Rasim Balayevin qardaşı ilə bağlı gördüyü təəssüfedici bir məqamı qabardıb.

Kult.az Bakupost.az-a istinadən jurnalistin 2 gün öncəki sosial şəbəkə paylaşımını olduğu kimi təqdim edir:

"Hazırda Azdramdayıq, xalq artisti Rasim Balayevlə vida mərasimi keçirilir (Vida mərasimi 30 martda baş tutub - red.) Məncə, görməmiş kimi qəbrin içini işıqlandırmaq lazım deyil, amma səliqəli formada böyük sənətkarların vida və dəfn mərasimləri çəkilməlidir, tarixdə qalmalıdır. Bunun üçün də mediaya hörmət edilməlidir.

Hörmət edilmir, çəkiliş üçün şərait yoxdur, Azdramın ağzından süd iyi gələn uşaqlarını salıblar üstümüzə ki, qadağa var. Heç PPX belə davranmır. Bu uşaq və ona göstəriş verənlər anlamırlar ki, tarixdə "qadağa"lar yox, vida mərasimində sənətkara qoyulan hörmət qalacaq.

Vida mərasiminin kuliminasiya nöqtəsi Rasim Balayevin qardaşına qoyulan hörmətdir.

Yarım saatdır yanımda Rasim Balayevə oxşayan şəxs dayanıb. Tanımırdım, açıq deyim. Ardıcıl zənglərdən, nitqindən anladım ki, qardaşıdır. Ağzından süd iyi gələn o uşaq sənətkarın qardaşını önə buraxmır. Öndə yer yoxdur, öndə rəsmilər əyləşib.

Biz çəkirik ki, vacibdir, yaddaşda qalmalıdır. Əyləşənlər isə irad bildirirlər ki, önü görə bilmirik, çəkil, bir-ikisi ayağımdan dartdı, səbirli davrandım. Sonda qardaşına irad bildirdilər ki, ay kişi, önümüzdə dayanma. Kimsə qardaşı olduğunu irad tutanlara bildirəndə yenə də dedilər ki, fərqi yoxdur, baxa bilmirik. Ağsaqqal şəxslər irad tuturlar. Qardaşı da mədəni tonda, ehmalca bu cavabı verdi:

"Eybi yox, mən zaldan çıxaram".

Və çölə çıxdı..."