Ermənistan silahlı qüvvələri tərəfindən işğal olunmuş Azərbaycan-İran sərhədinin bir qisminin azad edilməsi bölgədə yeni imkanlar açır. Xüsusən bir neçə il əvvəl Azərbaycan Prezidenti İlham Əliyevin İrana səfəri zamanı imzalanan sazişlərin reallaşmasına şərait yaradır.

Axar.az xəbər verir ki, bu sözləri politoloq İlqar Vəlizadə deyib.

O bildirib ki, söhbət Xudafərin bölgəsində su təchizatı layihəsinin həyata keçirilməsindən gedir:

“Bu ərazidə İranla yeni bir nəzarət məntəqəsinin açılması və qonşu dövlətlə sərhəd əməkdaşlığının intensivləşdirilməsi olduqca vacibdir. Rəsmi Tehran artıq uzun illərdir kağız üzərində qalan bu layihələri ən qısa müddətdə həyata keçirməyə hazır olduğunu bildirir.

Xudafərinin ölkəmiz üçün əhəmiyyəti çox vacibdir, ermənilər bu və digər yolla İran-Azərbaycan münasibətlərinin korlanması üçün əlindən gələni edəcək. Onların istəkləri iki ölkənin münasibətlərini pozmaqdır. Regional qarşıdurma yaratmaq bölgədəki erməni siyasətinin əsl mahiyyətidir”.