Bakı Metropoliteni QSC-yə məxsus müxtəlif seriyalı metro vaqonlarının təmiri ilə bağlı növbəti işlərə start verilib.

Axar.az Teleqraf-a istinadla xəbər verir ki, bu məqsədlə 1 milyon 528 min 597 manat vəsait ayrılıb.

Texniki yenilənmələr çərçivəsində "PEK SVM 1" (ПЭК СВМ 01) və "PEK KVM 01" (ПЭК КВМ 01) tipli, həmçinin 81-760.B/761.B/763.B və 81-765.B/766.B seriyalı metro vaqonlarının kondisioner sistemlərinin təmirində istifadə olunan dəyişdiricilərin, eləcə də 81-717/714 seriyalı vaqonlar üçün nəzərdə tutulan şpinton tipli arabacıq çərçivələrinin alınması nəzərdə tutulur.

Sözügedən işləri Rusiya mənşəli "Spes Metro Postavka" (Спец Метро Поставка) şirkəti həyata keçirəcək.

Təmir prosesinə birbaşa nəzarət isə “Bakı Metropoliteni” QSC tərəfindən aparılacaq.

Qeyd edək ki, bu satınalma proseduru dövlət satınalmalarının vahid internet portalında keçirilməyib.