Türkiyədə tikilməkdə olan Akkuyu AES-in ilk enerji bloku yaxın vaxtlarda istifadəyə veriləcək.

Axar.az Teleqraf-a istinadən xəbər verir ki, bu barədə “Akkuyu atom” şirkətinin baş direktoru Sergey Butskix bildirib.

Onun sözlərinə görə, hazırda dörd enerji bloku üzərində iş gedir.

Layihəsi Rusiyanın "Rosatom" şirkəti tərəfindən hazırlanan AES Türkiyənin cənubunda Mersin vilayətində tikilir. O Türkiyədə ilk AES olacaq. AES-in tikintisinə 2018-ci ildə başlanılıb. Tikintisinin 2026-cı ildə başa çatdırılması planlaşdırılır. Akkuyu hər birinin gücü 1200 MVt olan VVER-1200 reaktorlu dörd enerji blokundan ibarət olacaq. Layihənin ümumi dəyəri 22 milyard dollar qiymətləndirilir.