Cari illə müqayisədə 2026-cı ilin dövlət büdcəsi layihəsində şəhər və rayonların gəlirlərindən mərkəzləşdirilmiş gəlirlərə aid edilən hissəsində artım, yerli gəlir və xərcləri tənzimləmək üçün mərkəzləşdirilmiş xərclərdən ayrılan vəsait üzrə isə azalma proqnozlaşdırılıb.

Axar.az Teleqraf-a istinadla xəbər verir ki, bu, Azərbaycan Respublikasının 2026-cı il dövlət büdcəsinin layihəsinə Hesablama Palatasının Rəyində öz əksini tapıb.

2026-cı ilin dövlət büdcəsi layihəsində yerli gəlirlər 758,3 mln. manat, yerli xərclər isə 759,1 mln. manat məbləğində proqnozlaşdırılıb ki, bu da 2025-ci ilin göstəricilərindən, müvafiq olaraq, 36,7 mln. manat (4,6%) və 41,2 mln. manat (5,1%) azdır.

Təqdim olunan məlumatların təhlili 2026-cı ilin dövlət büdcəsi layihəsində yerli gəlirlərin əksər şəhər və rayonlar üzrə azalma ilə proqnozlaşdırıldığını göstərib.

Qanun layihəsinə əsasən, 2026-cı ildə şəhər və rayonlardan 66-sı (Cəbrayıl, Xocalı, Kəlbəcər və Yardımlı rayonları əlavə olunmaqla) xərclərini dövlət büdcəsindən maliyyə yardımı (dotasiya) almadan öz gəlirləri hesabına təmin edəcəklər. Yerli gəlir və xərcləri tənzimləmək üçün dövlət büdcəsinin mərkəzləşdirilmiş xərclərindən maliyyə yardımının (dotasiyanın) ayrılması məqsədilə 1 rayon (Xocavənd) üzrə 0,8 mln. manat vəsait proqnozlaşdırılıb. Son illər üzrə dövlət büdcəsinin mərkəzləşdirilmiş xərclərindən maliyyə yardımının (dotasiyanın) ayrılması nəzərdə tutulan rayonların sayında və vəsaitin məbləğində azalma tendensiyası müşahidə olunub.