Hələ də yol kənarında, açıq havada ət məhsulları, diri heyvanlar satılmaqdadır. Özü də kəsim qaydalarına nəzarət edilmədən, antisanitar şəraitdə təmizlənərək.

Xəzər xəbər xəbər verir ki, Xətai rayonu, Telnov küçəsində, maşınların sıx hərəkət etdiyi yolda, açıq havada quş əti satılır.

Ticarət cərgəsinin 10-a yaxın obyekti bu işlə məşğuldur. Halbuki belə şəraitdə ət satışı qətiyyən qəbul olunan deyil. Satıcılar da bunu bildiyi üçün bizi görən kimi qaçmağa çalışır.

Görüntülər hər şeyi ortaya qoyur. Diri quşlar elə burdaca necə gəldi kəsilir, ortabab təmizlənir və şütüyən maşınların 1 metrliyində satılır.

Bu ətlər həm də baytarlıq nəzarətindən keçirilmir. Ətin sağlam olması və satışına icazə verilməsi haqda möhürlü sənədi istəyirik, yoxdur. Əvəzinə baytar həkimə ödənilən məbləğə görə verilən mədaxil qəbzini göstərirlər.

Baytar həkimin yeri bilinmir. Satıcı isə ümumiyyətlə gigienik sertifikat haqda məlumatsızdırlar.

Əvvəla qaydadan kənar olan budur ki, belə məhsullar xüsusi ayrılmış yerlərdə, nəzarət altında satılmalıdır. Sanitariya və ticarət qaydalarına görə küçədə belə satış qadağandır.

İşin vicdani tərəfinə gəlincə, satış üçün hazırlanan bu ətlər tam sanitar qaydada kəsilmir, təmizlənmir, içalatları necə gəldi, ətrafa yayılıb.

Respublika Gigiyena və Epidemiologiya Mərkəzindən bildirirlər ki, ət küçədə asılı vəziyyətdə uzun müddət qalırsa, küləyin qaldırdığı tozdan ətə çoxlu zərərli mikro orqanizmlər və avtomobillərdən ayrılan zərərli qazlar yapışır. Bu, müştərilən sağlamlığı üçün ciddi təhlükədir.