İsmayıllıda Zərnava kəndi ilə rayon mərkəzi arasında nəqliyyat əlaqəsi kəsilib.

Kəndin aşağı hissəsindəki otlaq sahəsi və kol-koslu ərazidə torpaq sürüşməsi olub.

Ümumilikdə 15 hektar ərazidə sürüşmə qeydə alınıb. Kənd bələdiyyəsinin sədri Əliqulu Yedigarov bildirib ki, bu gün Fövqəladə Hallar Nazirliyinin, Nəqliyyat Nazirliyinin və İsmayıllı rayon İcra Hakimiyyətinin nümayəndələri əraziyə baxış keçiriblər və sakinlərlə görüşüblər.

Avtomobil yolunun 300 metrlik hissəsi dağılaraq yararsız hala düşüb. Hazırda kənd sakinləri sürüşmə ərazisindən piyada və at vasitəsilə keçərək hərəkət edirlər.

Kəndə alternativ avtomobil yolunun çəkilişi üçün bu gün başqa bir ərazi seçilib. İyunun 6-da kəndə ağır texnika gətiriləcək və yeni yol çəkiləcək.

Ə.Yedigarovun sözlərinə görə, əvvəllər də kənddə torpaq sürüşməsi qeydə alınıb, sonuncu dəfə güclü leysandan sonra xeyli aktivləşib və böyük ərazini əhatə edib. O qeyd edib ki, sürüşmə zamanı kənddəki 8 ədəd fərdi yaşayış evinin divarlarında çatlar əmələ gəlib.

Qeyd edək ki, sürüşməyə səbəb mayın 29-da İsmayıllı rayonuna yağan yağışın səbəb olduğu bildirilir. /APA/