Bu gün 11:30-da Nərimanov Rayon Məhkəməsində Əməkdar artist Mətanət İsgəndərlinin "Aznews.az" xəbər saytının baş redaktoru Elçin Zahiroğlu və media orqanının əməkdaşı İntiqam Valehoğluna qarşı xüsusi ittiham qaydasında qaldırdığı iddia ilə bağlı məhkəmə prosesi keçirilib.

Axar.az xəbər verir ki, M.İsgəndərli jurnalistlərin azadlıqdan məhrum edilməsini tələbində israr edib və iddia üzrə məhkəmə baxışı aparılıb.

Jurnalist Anar Niftəliyevin verdiyi məlumata görə, hakim Turqay Hüseynov özünü büsbütün şikayətçi tərəfin vəkili kimi aparıb. Jurnalistlərin hüquqlarını qoruyan vəkil Elçin Sadıqov tərəfindən verilən suallar protokola əlavə olunmayıb, hətta müttəhim qismində məhkəmədə iştirak edən baş redaktor Elçin Zahiroğlunun çıxışı dəfələrlə kəsilib və hakim ona ittiham edən tərəfinin verməli sualları özü şəxsən ünvanlayıb.

Məhkəmədə insident də yaşanıb və hakim heç bir səbəb olmadan Axar.az saytının baş redaktoru Anar Niftəliyevə kobud və uyğun olmayan reaksiya verib, onu zaldan çıxarmaqla hədələyib.

Anar Niftəliyev məhkəmə zalından uzaqlaşdırılması tələbi və hakimin kobudluğu ilə bağlı məqama "Aznews.az" saytına verdiyi açıqlamada aydınlıq gətirib:

"Əlimi qaldırdım və söz demək istədim. Ondan əvvəl vəkillərlə bu barədə məsləhətləşmişdim və mənə bildirilmişdi ki, hakimdən icazə alıb danışa bilərəm. Amma Turqay Hüseynov mənə çox sərt, kobud şəkildə dedi ki, siz kimsiniz, zalı tərk edin. Mən də ona izah etməyə çalışdım ki, iclasın gedişini pozmamışam, hətta söz belə deməmişəm, sadəcə, əlimi qaldırmışam: normal şəkildə söz verə və yaxud, verməyə bilər. Yalnız bundan sonra "vermirəm" deyib, əyləşə biləcəyimi bildirdi. Ancaq bu qədər mövqeli və qərəzli bir prosesdə daha necə oturaydım? Hakimi qıcıqlandıran nə idi ki, əlimi qaldırdığım anda dərhal belə kobud reaksiya verdi?"

Anar Niftəliyev bu prosesdə Nərimanov Rayon Məhkəməsinin hakimi Turqay Hüseynovun işə qeyri-obyektiv və qərəzli münasibətinin hamılıqla şahidi olduqlarını deyir:

"Hər şeydən əvvəl deyim ki, bizim üçün ən maraqlı məsələ Cinayət Məcəlləsinin 147.1-ci maddəsi ilə xüsusi ittiham qaydasında olan şikayət ərizəsinin məhkəmə tərəfindən qəbul olunması idi. Bilirsiniz ki, bir neçə gün öncə cənab Prezident İlham Əliyev AŞPA-dakı çıxışında bu məqamı xüsusi olaraq vurğuladı ki, 2009-cu ildən üzü bəri Azərbaycanda diffomasiyaya görə heç bir jurnalist həbs olunmayıb. Bundan əvvəl də diffomasiya ilə bağlı məsələlər ATƏT-in nümayəndələri ilə Bakıda dəfələrlə müzakirə olunmuşdu və CM 147-ci maddəsi ilə artıq heç bir jurnalistin mühakimə olunmadığı bəlli həqiqətdir. Belə olan təqdirdə xüsusi ittiham qaydasında verilən şikayət ərizəsi niyə qəbul olunub?"

A.Niftəliyev bildirib ki, ölkə başçısının AŞPA-da ortaya qoyduğu iradədən sonra bu cür şikayət ərizəsinin xüsusi ittiham qaydasında qəbul edilməsinin səbəbləri maraq doğurur:

"Həm də Azərbaycan Avropa Şurasının Nazirlər Kabinetində sədrliyə başlayıb və ölkəmiz hazırda diqqət mərkəzindədir. Eyni zamanda, ATƏT-in iyunun 28-dən başlayan və iyulun 2-nə qədər davam edəcək geniştərkibli sessiyası Bakıda keçirilir. ATƏT müşahidəçilərinin və dünyanın 53 ölkəsinin 500-dən çox nümayəndəsinin, həmçinin ermənilərin Bakıda olduğu bir məqamda bir baş redaktorun diffomasiyaya görə xüsusi ittiham qaydasında məhkəmə prosesinin aparılması təəccüblüdür".

Baş redaktorun fikrincə, ölkədə bu qədər Avropa nümayəndəsinin olduğu bir vaxtda bu prosesin keçirilməsi heç də xoş rəy yaratmır və burda ölkənin mənfi imicinin formalaşmasını istəyən hansısa maraqlı tərəflərin olması ilə bağlı təəssürat yaranır:

"Fikir verin, həmişə beynəlxalq təşkilatların nümayəndələri Bakıda olanda hansısa məhkəmədə jurnalistə qarşı xüsusi ittiham qaydasında ittiham irəli sürülür və məhkəmə prosesi aparılır. Sanki gizli bir əl bütün bunları təşkil edir və diqqətin Bakıya yönəldiyi məqamda bu proseslər xarici qonaqlara kompromat kimi təqdim olunur".

Hakimi qeyri-obqeytiv və qərəzli münasibətinin müəyyənləşməsi üçün prosesin video-şəkilişinə baxılması və qiymətləndirilməsi mümkünlüyü ilə bağlı Ədliyyə Nazirliyinin mətbuat xidmətindən bildirildi ki, hakimlərin məhkəmənin tələblərini pozması halları ilə bağlı şikayəti yalnız Məhkəmə-Hüquq Şurasına müraciət olunmalıdır.

Məhkəmə-Hüquq Şurasının məlumat mərkəzindən isə qeyd olundu ki, ittiham olunan tərəf və yaxud onun vəkili müraciət edəcəyi təqdirdə araşdırma aparılacaq.

Baş redaktor Elçin Zahiroğlu video-yazının izlənməsi və hakimin qərəzinin üzə çıxarılması üçün mümkün olan bütün hüquqi addımların atılacağını bildirdi.

Xatırladaq ki, İsgəndərovanın məhkəməyə müraciət etməsinə səbəb "Aznews.az" saytında barəsində gedən yazıdakı "narkoman" ifadəsidir.