Respublikanın qocaman mətbu orqanlarından biri - Salyanda çıxan "Qələbə" qəzetinin 90 illik yubileyi keçirilib.

Yubiley toplantısında "Qələbə" qəzetinin keçdiyi tarixi yola nəzər salınıb. Bildirilib ki, 1924-cü il fevralın 21-də qəzetin ilk nömrəsi "Qırmızı Muğan" adı ilə işıq üzü görüb və indiyədək 8300 nömrəsi çapdan çıxıb.

Müxtəlif illərdə "Sosializm yolu", "Məhsul", 1965-ci ildən isə qəzet "Qələbə" adı ilə buraxılıb. Salyanın mədəni, ictimai-siyasi həyatının salnaməsinin yaradılmasında bu mətbu orqanının əvəzsiz xidmətləri olub.

Mərasimdə Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli, Mətbuat Şurasının sədri Əflatun Amaşov və başqaları iştirak edib, mətbu orqanının ünvanına xoş arzular bildiriblər. Qəzetin maddi-texniki bazasının möhkəmləndirilməsi, tirajının artması və əməkdaşların sosial şəraitinin yaxşılaşdırılması da bu qayğının təzahürü kimi səciyyələndirilib.

Sonda qəzetin bir qrup əməkdaşına rayon İcra Hakimiyyətinin Fəxri Fərmanları və hədiyyələri verilib.

Gün.az